生日雙周

其實生日雙周一早已過，只是總沒空寫番個悼念之詞。四生曾點名要求看生日記事，小的怎敢不從？

一鞠躬
頭場係馮大狀伉儷、mont哥及德生打邊爐。我最鍾意呢類熱熱鬧鬧既gathering，成檯都係把口唔收之眾(其實我有幾多位朋友把口係收既呢？我真係諗唔到，哈哈)。尤其當晚直播阿根廷數六球的誇張賽事，周圍食客都叫得鬼咁盡慶，氣氛一流！仲有啤酒小姐件粉紅T加纖腰助興，真係開心！

再鞠躬
二場家人buffet，so far so good. 但係呢餐當埋父親節，我俾左…唯有開埋阿媽封生日利是補數。然後與白氏伉儷及四生來個劈酒通k聚會。好耐無又唱又劈，梗係高興！小妹那段時間喉部長期不適，唱唔到王菲，兩杯落肚好彩仲開到eason演唱會，joe及amy一向係k精鐵腳，大家心中有數安守秩序唱得開心，驚喜發現四生把聲man得來好鬼溫柔，唱得唔錯！當晚並非飲好多但都達到wing既效果，就係咁，wing下唱下又天光！四生，當日你無同我地通頂而發生既悲慘遭遇，我會另行寫落自己本日記簿仔架啦…呢個教訓代價咁大，要記住呀！

三鞠躬
三場係黃金十幾年聚舊夜，中學老死除熊熊夫婦身體不適未能出席之外，全部現身，包括文文、charlotte、茜及未婚夫，連稀客doish亦攜眷出席，場面之盛大可謂近年罕見！我覺得相當威！是夜吹吹水，見大家無恙，也就很好！我們不是經常聚會，但每次見面都嫌時間不夠，雞啄唔斷唔捨得走。是晚食物一般，但那間private room坐得很高興，我們咁嘈，有間房仔唔駛嚇親其他食客真係功德無量。

謝禮！
得到靚袋、心愛經典CD、高貴匙扣、正貨handcream、心頭好書及泳衣(即阿媽封利是)，如有未送又想送的，隨時歡迎！其實有你地陪玩已經好開心！鞠躬致意！(出年我幾十歲大壽…不如搞大d！一於聯袂擺幾圍！)

無限感激！